Árnesþing | Skóla- og velferðarþjónusta | Fréttir frá skólaþjónustu

Þann 1. janúar næstkomandi verður eitt ár frá því Skólaþjónusta Árnesþings tók til starfa, í kjölfar lokunar Skólaskrifstofu Suðurlands. Skólaþjónustan er sameinuð velferðarþjónustu undir heitinu Skóla- og velferðarþjónusta Árnesþings. Í skólaþjónustunni starfa nú tveir kennsluráðgjafar og einn sálfræðingur. Þessir aðilar annast sérfræðiþjónustu í 14 leik- og grunnskólum í sjö sveitarfélögum; Bláskógabyggð, Flóahreppi, Grímsnes- og Grafningshreppi, Hveragerðisbæ, Hrunamannahreppi, Skeiða- og Gnúpverjahreppi og Sveitarfélaginu Ölfus.

Í byrjun árs var haldinn hugarflugsfundur þar sem sveitastjórnarmenn, skólastjórar, fulltrúar foreldra og sérfræðingar skólaþjónustu ræddu áherslur í skólamálum. Þar var lagður grunnur að framtíðarsýn og markmiðum skóla- og skólaþjónustu sem unnið verður að til ársloka 2017. Markmiðin eru: 1. Jákvæð sjálfsmynd, vellíðan og heilbrigði. 2. Samfella milli skólastiga. 3. Lestur. 4. Einstaklingsmiðað nám og nýting tölvutækni. Hægt er að kynna sér markmiðin og hvernig verkefnið verður metið á heimasíðu Skóla- og velferðarþjónustu, www.arnesthing.is.

Í ágúst bauð skólaþjónustan upp á nokkur námskeið fyrir leik- og grunnskólakennara í samvinnu við skólaþjónustuna í Árborg. Sum námskeiðanna héldu áfram út skólaárið. Námskeiðin fjölluðu um námsmat, listsköpun, íþróttakennslu, skipulag kennslu fyrir nemendur með hegðunarerfiðleika og vegna almennrar kennslu. Einnig var í vor boðið upp á námskeið í Logos, sem er tölvutækt greiningartæki vegna lestrarerfiðleika. Í haust hafa skólastjórnendur á svæðinu, ásamt sveitastjórum, setið námskeið í leiðtogaþjálfun með áherslu á markþjálfun. Þá hafa sérfræðingar skólaþjónustu verið með námskeið og fræðslufundi í skólunum á skipulagsdögum og einnig staðið fyrir opnum námskeiðum fyrir leik- og grunnskóla. Skólastjórnendur hittast einnig reglulega og ræða ýmis sameiginleg úrlausnarefni og nýjungar í skólastarfi.

Þann 1. september síðastliðinn stóð skólaþjónustan fyrir námskeiðsdegi/skólaþingi sem haldið var í Þorlákshöfn. Þar komu saman allir starfsmenn leik – og grunnskóla á svæðinu, samtals um 300 þátttakendur. Ásdís Olsen hélt erindi um hamingju í skólastarfi en auk þess voru yfir 20 málstofur þar sem kennarar kynntu ýmis spennandi verkefni sem unnin eru í skólum á svæðinu. Þingið tókst í alla staði vel, það var sérstaklega ánægjulegt að sjá alla starfsmenn leik- og grunnskóla vinna saman á þessum degi og fá tækifæri til að auka samræðu milli skólastiga. Fjöldi tilvísana hafa borist skólaþjónustunni á þessu ári. Sálfræðingur skólaþjónustunnar annast ráðgjöf til foreldra, kennara og nemenda og gerir sálfræðilegar athuganir sem fara fram úti í skólunum. Kennsluráðgjafar hafa sinnt ýmsum ráðgjafamálum í samvinnu við skólana er varða nemendur, kennara og foreldra. Allir starfsmenn skólaþjónustunnar sinna eftirfylgd í þverfaglegum teymum sem reynst hefur afar vel. Það er ósk okkar að skólaþjónusta Árnesþings haldi áfram að vaxa og dafna og stuðla að kraftmiklu skólastarfi á svæðinu. Við þökkum foreldrum, skólastjórum, kennurum, starfsfólki skóla og sveitarstjórnarfólki fyrir gott samstarf á þessu fyrsta starfsári og hlökkum til að vinna að nýjum og spennandi verkefnum á nýju ári.

Hrafnhildur Karlsdóttir teymisstjóri og kennsluráðgjafi, Hugrún Vignisdóttir sálfræðingur, Ólína Þorleifsdóttir kennsluráðgjafi

« Til baka í tilkynningar